के पललाई सनिषाले मात्र पत्याएकी हुन् ?

नायक तथा मोडल पल शाहले जेल जीवनबाट बाहिर आएको डेढ महिनापछि काम गरेको पहिलो म्युजिक भिडियो ‘तिमीलाई हेर्ने बानी पर्यो’को फिमेल भर्सनमा मोडल सनिषा भट्टराइले काम गरिन् । यो भिडियाले बजारमा राम्रै चर्चा पाइरहेको छ । पलको जेल जीवनको वास्तविक घटना प्रस्तुत गरेकाले पनि यो भिडियोले बढी चर्चा पाएको हो ।

यसपछि पलको अर्को भिडियो ‘आँशु बनी नखस’ सार्वजनिक भयो । यो भिडियोमा पनि पलले सनिषासँग नै काम गरे ।

छायांकन सेटमै पहिलो पटक पल र सनिषाको भेट भएको थियो । पलको काम र व्यवहारबाट प्रभावित भएको सनिषाले बताएकी छिन् । यो भिडियो सार्वजनिक भएको एक सातापछि पल र सनिषाकै अर्को भिडियो बजारमा आउने तयारीमा छ । ‘सक्छौं र तिमी म विना बाँच्न’ बोलको गीतमा पल र सनिषाकै अभिनय छ । पल र सनिषाले चौथो म्युजिक भिडियोमा पनि काम गरेका छन् । काजिश श्रेष्ठको निर्देशनमा तयार भएको नयाँ भिडियोमा यी दुइलाई देख्न सकिन्छ ।

पलले लगातार चार वटा भिडियोमा सनिषालाई नै रोज्नुको कारण के होला ? के पलसँग अरु मोडल र नायिकाले काम गर्न आनाकानी गरेका हुन् त ? यो बिषयमा केही दिन अगाडि आयोजित पत्रकार सम्मेलनमा पलले पत्रकारलाई नकारात्मक रुपमा नसोच्न आग्रह गरेका थिए ।

तर, पल र सनिषाको भिडियो लगातार ४ वटा आउनुले भने संकेत त्यसतर्फै गरेको छ । पलको भिडियोका लागि उनले जेल जानु अगाडि काम गरेका केही नायिकालाई अफर गरिएको तर उनीहरुले नगरेको वुझिएको छ । यसैले पनि पलले सनिषासँग काम गर्न सहज हुने देखेरै उनीसँग लगातार काम गरेका हुन् कि भन्ने प्रश्न उठेको छ ।